Author Archives: Man

復活節假期

尋日係假期第一日,同老公出去買o野俾阿女。由於阿女而家已經5m1w大,所以我o地就為佢準備食固體食物買定o的o野;我o地買o左 Holle 米糊同一o的食具。然後又為夏天來臨幫阿女置o左少少居家服。 買完o野落大雨,就算擔遮都冇用,返到屋企全身濕晒,好彩冇帶阿女出去! 今日假期第二日,一早起身老公話好唔舒服,個肚好痛又想嘔。另一方面,阿女飲奶同嘔奶問題依然纏繞住我o地。尋日佢飲得好少,今朝竟然都唔肯飲奶,而且仲嘔奶。阿媽話阿女平時朝早都會笑,但今日就呆滯,我即刻打電話去平時睇開o個個兒科。不過由於今日係紅假,所以一直冇人聽。跟住我打返去港安,又話冇兒科醫生註院。跟住我就試o下打去仁安,佢話紅假又係冇兒科醫生,不過可以幫我 call 醫生返去,但係淨係醫生費都要 $2000. 我見咁貴同唔識o個個醫生就冇同阿女出去。 下午等元朗一個兒科醫生開門就同阿女出去,點知勁多人,唔知要等到幾時。診所環境唔理想,好多病童,佢o地又冇家教,係咁咳又唔掩住個嘴;阿女係咁喊我就帶佢返屋企,諗住再觀察o下先。 唉…… 假期快o的完啦,想帶阿女睇相熟o既醫生。

Posted in 鄒太有o野講 | 8 Comments

靚靚 BB 衫

今晚o係網上睇o的 BB 女衫,發現有個牌子o既衫好靚,叫 Biscotti. 但係o的衫超貴,介乎 HKD500-HKD1000/ piece, 真係唔捨得買!

Posted in 鄒太有o野講 | 4 Comments

oh yes IT’s FREE!!!

一向都好介意用二手o野,但自從有o左個女,駛o左好多錢 (出世、儲臍帶血、請陪月、買嬰兒用品就已經用o左 17萬!),所以我都慢慢接受o左,相熟o既人送二手BB床俾我我都會用。 跟住發現o左 Facebook 有個 group 叫 “oh yes IT’s free!!!”, 就成日去睇。o個度o的人好得意,你諗到或諗唔到o既o野,都有人放或者要。其實呢個文化幾好,可以令到o的o野物盡其用,唔好浪費o左o的資源。 雖然我接受唔到用陌生人o既o野,但就成功送出過一o的o野,感覺幾好~

Posted in 鄒太有o野講 | Leave a comment

恐怖o既念頭

一直受住阿女唔鐘意飲奶困擾,最近仲少到離譜,好擔心佢o既健康。睇醫生就話唔好逼佢飲,佢肚餓就自然會飲。但係我個女就係都唔肯飲,見奶樽就喊,試過好多方法情況都冇改善。 真係好想昏迷一段時間,醒o既時候乜o野問題都解決晒……

Posted in 鄒太有o野講 | Leave a comment

阿女100日!

阿女尋日100日大喇! 諗返轉頭,由生o左阿女到而家,好似過o左一個世紀,經歷o左好多o野…… 最黑暗o既時間就係阿女未到兩個月o個陣,突然有一段時間厭奶,見到奶樽就喊,飲得比滿月o個陣少兼成日嘔奶,餐餐都餵成個幾兩個鐘;佢辛苦、餵佢o個個又辛苦。見o左幾個醫生同護士,都話佢唔想飲就唔好逼佢,但試問見到個女飲o既份量係佢每日應該要飲到o既一半、生長速度o岩o岩達到條生長線,做父母o既又點可以咁容易放棄餵佢呢? 另一方面,最開心就係見到佢o既成長。第13日開始啜手指、探索自己o既身體,第60日人仔識講 “Hello”, 第97日同佢o玩o個陣識笑到卡卡聲…… So far, 我每日都有同佢影相 (除o左1月2日因為佢病o左,淨係顧住照顧佢同擔心而唔記得影相),見證住佢每日o既成長!

Posted in 鄒太有o野講 | Leave a comment

我 OK

之前因為工作原因,返唔到健康院見專科護士,健康院好緊張,打過o黎幾次約時間,今日終於去到。 個護士問好多關於屋企o既o野、又問返我之前小產o既o野、又填問卷,足足傾o左兩個鐘。護士見我情緒 OK, 話唔係好擔心我產後抑鬱o既問題,仲話唔安排我再返去。其實我都覺得自己冇乜o野喇,不過傾談中都得到一o的幾好o既建議,值得參考。Anyway, 護士叫我最緊要顧好自己情緒先,其它o野都係其次,唔想處理住就唔好勉強。

Posted in 鄒太有o野講 | Leave a comment

產後抑鬱?

生完阿女一個月嗰陣返港安做最後一次產後檢查,填一份關於產後抑鬱嘅問卷,可能指數幾高,盧醫生好緊張,問我有乜唔開心。同我傾咗一陣,跟住又交帶個姑娘要同我跟進;仲同我講只係會傾o下偈,唔會煩到我。兩日後醫院院牧打嚟,不過我較咗震機聽唔到…… 阿女今日返健康院打兩個月嘅肺炎鏈球菌針,又填返同一份問卷,我覺得我嘅情緒已經改善咗好多,但點知個分數同上次一樣。跟住個姑娘話我個情況都幾嚴重,仲轉介我去睇專科。 其實我真係覺得好咗好多,只要俾我靜o下,唔好騷擾我,我慢慢就會好番。

Posted in 鄒太有o野講 | Leave a comment